دل کو یہ احسان اٹھانا پڑتا ہے

دل کو یہ احسان اٹھانا پڑتا ہے
آنکھوں سے احوال سنانا پڑتا ہے
راتیں خیر گزر جاتی ہیں خلوت میں
دن میں تو کردار نبھانا پڑتا ہے


لحظہ لحظہ خواب میسر آتے ہیں
رفتہ رفتہ ہوش گنوانا پڑتا ہے
چپکے چپکے اپنے اندر جاتے ہیں
سہمے سہمے باہر آنا پڑتا ہے


بستی بستی ویرانی ہے صدیوں کی
صحرا سے یہ راز چھپانا پڑتا ہے
خاموشی ہی خاموشی ہو پہلو میں
تب دنیا میں شور مچانا پڑتا ہے