dil mein dam-bhar ke liye nawak-e-jaanan na raha

dil mein dam-bhar ke liye nawak-e-jaanan na raha
mezban se kabhi khush ho ke ye mehman na raha
ashk sab khushk hue aankhon mein soz-e-gham se
chalo achchha hua ruswai ka saman na raha


is qadar kar diya sairab mere chhaalon ne
ek bhi tishna-dahan khar-e-bayaban na raha
pahle arman tha tere milne ka tujh se mil kar
ab ye arman hai ki dil mein koi arman na raha


kya buri chiz mohabbat hai khuda rahm kare
yahi sunte hain ki 'rafat' bhi musalman na raha