dil mera us shaKHs ki jagir hai

dil mera us shakhs ki jagir hai
jis ke aane mein abhi takhir hai
shan se jita hun jo main zindagi
ye mere ajdad ki tasir hai


asl mein dekha gaya to zindagi
bas hamari maut ki tahrir hai
dil mera yun hi nahin ghayal hua
kuchh tumhaari bhi nazar mein tir hai


aadmi ye kaam ka hai sochna
ye bhi to ek soch ki ta'mir hai
main jise samjha tha apna ham-safar
der se bola ki bas rahgir hai


aaj ke insan ko dekho zara
har kisi ke pair mein zanjir hai
ye zamana kis taraf badhne laga
us taraf ta’zir hi ta'zir hai


main hatheli par liye ek khwab ko
ja raha hun jis taraf ta'bir hai