dil rashk-e-aftab nazar aa raha hai aaj
bilkul tera jawab nazar aa raha hai aaj

khud husn be-naqab nazar aa raha hai aaj
kitna hasin khwab nazar aa raha hai aaj

meri nigah-e-shauq ki tasir dekhiye
jalwon mein iztirab nazar aa raha hai aaj

har-har nafas pe ek qayamat guzar gai
dil phir bhi mahw-e-khwab nazar aa raha hai aaj

'makhmur' kis ne dekh liya chashm-e-mast se
dil be-khud-o-kharab nazar aa raha hai aaj