dilon ko todne walo khuda ka khauf karo
gire huon ko utha lo khuda ka khauf karo

chamak kar aur badhao na meri siyah-bakhti
bade gharon ke ujalo khuda ka khauf karo

na jao kar-e-mohabbat mein chhod kar tanha
zara sa hath bata lo khuda ka khauf karo

hamein bhi rah dikha do bada andhera hai
jahan mein raushni walo khuda ka khauf karo

hamari laghzish-e-pa par na yun hanso tanzan
khudara badh ke utha lo khuda ka khauf karo