دن کے ہنگاموں میں دنیا تھی تماشائی مری

دن کے ہنگاموں میں دنیا تھی تماشائی مری
پھر وہی میں تھا وہی رات کی تنہائی مری
مجھ میں سر گرم ہے اک معرکۂ کرب و بلا
اور مری فتح ہوئی جاتی ہے پسپائی مری


اپنے ہی آپ میں ڈوبا ہوں نہ جانے کتنا
زندگی ناپ رہی ہے ابھی گہرائی مری
ڈوبنے اور ابھرنے کا تماشا تھا مرا
اور اک بھیڑ تھی ساحل پہ تماشائی مری


جرم یہ تھا کہ اسے دیکھ لیا تھا یوں ہی
اور سزا یہ ہے کہ جاتی رہی بینائی مری