din raat ki aafat ke siwa kuchh nahin aata

din raat ki aafat ke siwa kuchh nahin aata
chahat mein musibat ke siwa kuchh nahin aata
lo chae mein bhi chae ki patti nahin dali
tum ko to mohabbat ke siwa kuchh nahin aata


duniya ki har ek man mein kami ye hai ki us ko
bachchon ki hifazat ke siwa kuchh nahin aata
sapnon mein bhi sapnon ka jahan dhundhne walo
sapnon mein haqiqat ke siwa kuchh nahin aata


dushman mere yaron se sabaq sikh rahe hain
yaron ko 'adawat ke siwa kuchh nahin aata
neki bhi kamai hai bhalai bhi mili hai
par kaam to daulat ke siwa kuchh nahin aata


is daur mein apna ya paraya nahin koi
ab yaad zarurat ke siwa kuchh nahin aata
khud apne kahe par wo 'amal kyon nahin karte
kya un ko nasihat ke siwa kuchh nahin aata