dosti chiz hai kya rasm-e-wafa kaisi hai
hum se puchhe koi jine ki saza kaisi hai

tu khafa mujh se nahin hai to bata phir ai dost
tere lahje mein takalluf ki ada kaisi hai

jab ki mumkin hi nahin marka-e-karb-o-bala
phir har ek jism pe khun rang-e-qaba kaisi hai

tai kiya main ne tere sath charaghon ka safar
log jab soch rahe the ki hawa kaisi hai

teri raftar ne ehsas ko paikar bakhsha
warna kis ko thi khabar baad-e-saba kaisi hai