dosti jab kisi se ki jae
dushmanon ki bhi rae li jae

maut ka zahr hai fazaon mein
ab kahan ja ke sans li jae

bas isi soch mein hun duba hua
ye nadi kaise par ki jae

agle waqton ke zakhm bharne lage
aaj phir koi bhul ki jae

lafz dharti pe sar patakte hain
gumbadon mein sada na di jae

kah do is ahd ke buzurgon se
zindagi ki dua na di jae

botalen khol ke to pi barson
aaj dil khol kar hi pi jae