duniya ko ehtiram ka matlab nahin pata

duniya ko ehtiram ka matlab nahin pata
yani hamare nam ka matlab nahin pata
muddat se chal raha hun main manzil ki chah mein
ab tak mujhe qiyam ka matlab nahin pata


kitni bhi dhum-dham ho lagta nahin hai ji
is dil ko dhum-dham ka matlab nahin pata
fatwa wo de raha hai musalsal haram ka
jis shakhs ko haram ka matlab nahin pata


ye nafraten ye shor ye nare ye qatl-e-am
tum ko hamare ram ka matlab nahin pata
kahte hain kyon udas ho 'shahid-karim’ tum
jin ko udas sham ka matlab nahin pata