duniya mein hun duniya ka talabgar nahin hun
bazar se guzra hun kharidar nahin hun

zinda hun magar zist ki lazzat nahin baqi
har-chand ki hun hosh mein hushyar nahin hun

is khana-e-hasti se guzar jaunga be-laus
saya hun faqat naqsh-ba-diwar nahin hun

afsurda hun ibrat se dawa ki nahin hajat
gham ka mujhe ye zoaf hai bimar nahin hun

wo gul hun khizan ne jise barbaad kiya hai
uljhun kisi daman se main wo khar nahin hun

ya rab mujhe mahfuz rakh us but ke sitam se
main us ki inayat ka talabgar nahin hun

go dawa-e-taqwa nahin dargah-e-khuda mein
but jis se hon khush aisa gunahgar nahin hun

afsurdagi o zoaf ki kuchh had nahin 'akbar'
kafir ke muqabil mein bhi din-dar nahin hun