دنیا میں وہی کچھ ہے مری کارگزاری

دنیا میں وہی کچھ ہے مری کارگزاری
جو عمر سر کوچۂ دل دار گزاری
ہم کو بھی شرف بخش کبھی دربدری کا
اس آنکھ سے یہ عرض کئی بار گزاری


دل وار دیا اس کے در و بام پے میں نے
جاں نذر سر سایۂ دیوار گزاری
آج اس سے ملے ہیں تو یہ محسوس ہوا ہے
جتنی بھی گزاری ہے وہ بے کار گزاری


خود ہی سے کبھی ہار کبھی جیت گیا میں
خود ہی سے سدا برسر پیکار گزاری
ہر آن میں مصروف محبت رہا لیکن
لکھی ہی نہیں اس نے مری کارگزاری


اس دل کی زمیں سیر گہ عشق ہے ایسی
تعطیل یہاں اس نے کئی بار گزاری