اک حسن کامیاب ہے موسم بسنت کا

اک حسن کامیاب ہے موسم بسنت کا
عشرت سے باریاب ہے موسم بسنت کا
نغمہ سرا رباب ہے موسم بسنت کا
بیداریٔ شباب ہے موسم بسنت کا


دل دادۂ شراب ہے موسم بسنت کا
پیمانۂ ثواب ہے موسم بسنت کا
سب موسموں کی آب ہے موسم بسنت کا
واللہ آفتاب ہے موسم بسنت کا


سونا بچھا ہوا ہے ہر اک سبزہ زار پر
تصویر انقلاب ہے موسم بسنت کا
ہر چیز پر ابھار ہے ہر شکل پر نکھار
امڈا ہوا شباب ہے موسم بسنت کا


سرسوں کی آبرو پہ زمانے کی ہے نظر
قسمت کا لاجواب ہے موسم بسنت کا
رنگینیوں میں اس کی محبت کی ہے جھلک
تصویر بے حجاب ہے موسم بسنت کا


ہر زندگی پہ چھائی ہوئی بے خودی سی ہے
بکھری ہوئی شراب ہے موسم بسنت کا
دامن میں جس کے پھولتی پھلتی ہے آرزو
وہ حسن شوخ و شاب ہے موسم بسنت کا


کیا منظر حسیں ہے کہ دل شاد شادؔ ہے
جاگیر اضطراب ہے موسم بسنت کا