faqat diwar ka dar ka tahaffuz

faqat diwar ka dar ka tahaffuz
ho us se kya mere ghar ka tahaffuz
hamari zat hai bar-e-garan kab
magar ek masala sar ka tahaffuz


ali ki zat ka ye falsafa hai
ibaadat hai payambar ka tahaffuz
hain aankhen aaina dil ka yaqinan
hua dubhar khule ghar ka tahaffuz


ye shan-e-rab nahin to aur kya hai
karen kante gul-e-tar ka tahaffuz
difa-e-nafs mein ye ghumta hai
bhanwar se hai samundar ka tahaffuz


hawaon ki nazar is baat par hai
ki ho kaise bawandar ka tahaffuz
miyan-'hassas' kyun ho zid pe mail
koi karta hai kya shar ka tahaffuz