fasurda kar gaya agle zamanon se guzarna

fasurda kar gaya agle zamanon se guzarna
hawa ki shakl mein khali makanon se guzarna
dhuan bojhal faza-e-mai-kada aur phir achanak
kisi be-sakhta jumle ka kanon se guzarna


kisi aaseb ko mitti nahin deta hai koi
hamein mar kar bhi hai apne hi shanon se guzarna
ye jokham hi nae kuchh rang bhar sakta hai shab mein
mera is waqt dushman ke thikanon se guzarna


kisi patthar ki surat sakht-o-sakit hun abhi main
abhi baqi hai mera khak-danon se guzarna
abhi unchai par nazren hain lekin wapsi mein
giran hoga bahut aisi dhalanon se guzarna