fasurda lakh ho dil shoala-samani nahin jati

fasurda lakh ho dil shoala-samani nahin jati
sukun mein bhi mere dariya ki tughyani nahin jati
dam-e-nazzara bhi apni pareshani nahin jati
bikhar jate hain jalwe shakl pahchani nahin jati


dil-e-sada mein o zauq-e-mohabbat bakhshne wale
abhi tak teri bakhshish ki gul-afshani nahin jati
abhi tak pai-ba-pai nakaamiyon se dil nahin thakta
abhi tak aarzuon ki farawani nahin jati


na jaane kis nazar se tujh ko kis aalam mein kab dekha
ki ab tak dida-e-hairan ki hairani nahin jati
'saba' ne gudgudaya kuchh nasim-e-subh ne chheda
'mubarak' phir bhi gul ki pak-damani nahin jati