fauj-e-mizhgan ka kuchh irada hai
zulf-e-pechan ne lam bandha hai

lab-e-rangin ko kis ne chusa hai
dekh lo ye aqiq jhuta hai

kaun aaya chhadi sawari se
ne sawari ka kis ki shohra hai

dant khatte hue anaron ke
un ka seb-e-zaqan ye mitha hai

bosa-e-lab diya jo bigde ghair
phut mein tum ne qand dala hai

katte ho hamare nam ke harf
khub shosha hai zor-e-fiqara hai

wasf-e-qad ke do-chand hain mazmun
koi misra nahin hai dohra hai

dant kanghi ka he magar mujh par
mar-e-gesu jo kate khata hai

khub hai wasl-e-ashiq-o-mashuq
ye bhi jodi ka ek nuskha hai

zakhm-e-dil par namak chhidakwao
zaiqa mere munh ka phika hai

ghair ke ghar baja rahe ho sitar
tum ne dar-parda that badla hai

koi taza kuan jhakaenge
in dinon ikhtilat gahra hai

chutki angiya mein tum na takwao
gore sine mein nil padta hai

bosa honton ka mil gaya kis ko
dil mein kuchh aaj dard mitha hai

chain se hain faqir baad-e-fana
qabr ke bhi sirhane takiya hai

ai 'munir' aap kyun hain aazurda
ye to kahiye mizaj kaisa hai