fitrat pe uski main hua hairan ziyaada

fitrat pe us ki main hua hairan ziyaada
insan ki shakl mein mile shaitan ziyaada
mujh se tumhaare husn ki tahsin na ho saki
itni si baat pe utha tufan ziyaada


achchha tha tujh se meri shanasai nahin thi
ai na-shanas main hun pareshan ziyaada
barish hai tez chhat hai shikasta jagah jagah
is pe hamare ghar mein hain mehman ziyaada


shayad nahin hai is ke siwa mujh mein kuchh hunar
bas aadmi ki hai mujhe pahchan ziyaada
chehra tumhaara jaise koi mo'atabar kitab
pukhta hua hai aur bhi iman ziyaada


'atish' nahin hai zikr ukhuwwat ka kis jagah
bas padhte jaiye miyan quran ziyaada