آج اکٹھا کر کے عشق کے ماروں کو

آج اکٹھا کر کے عشق کے ماروں کو
گھیر لیا ہے ہم نے دنیا داروں کو
ساتھ کے سارے قیدی ایسا کہتے تھے
ہم نے بھی گھر مان لیا دیواروں کو


اچھے ہو کر لوٹ گئے سب گھر لیکن
موت کا چہرہ یاد رہا بیماروں کو
دھار کو پرکھا زنگ کے دھبے صاف کیے
پھر بیٹھک میں ٹانگ دیا تلواروں کو


جاؤ اپنے حصے کے تم عیش کرو
عشق میں ہم بھی بھول گئے تھے یاروں کو
میرے علاوہ کون جگانے آتا ہے
پچھلے پہر کے سوئے ہوئے بازاروں کو


صبح کا مطلب صبح کا پہلا سگریٹ تھا
وہ بھی اب لا حاصل ہے بیماروں کو