gar hum se na ho wo dil-sitan ek
kar dije zamin o aasman ek

aashiq ka tere hamare gham ne
chhoda na badan mein ustukhan ek

hum chhut ke jab qafas se aae
dekha na chaman mein aashiyan ek

kahti thi khalq rah ai zulekha
kanan se chala hai karwan ek

yak-rangi kahen hain kis ko, yani
do shakhs ka howe jism o jaan ek

sazish kisi dhab se kar bhi lije
us dar pe jo howe pasban ek

hai wan to naya raqib har dam
hone pate hain hum kahan ek

hasrat hai ki yun lute chaman aur
gul hum ko na dewe baghban ek

aahista ki qafile ke pichhe
aata hai gharib-e-na-tawan ek

hum karte hain sau zaban se baaten
yun kahne ko munh mein hai zaban ek

is par bhi ai 'mushafi' hamara
qissa ek aur hai dastan ek