gardish-e-chashm juda gardish-e-paimana juda
masti-e-baada juda aalam-e-mastana juda

lutf-e-mahfil nahin saqi ke chale jaane se
mai se shisha hai juda shishe se paimana juda

ek hi nur se mamur ye donon ghar hain
na to kaba hai juda aur na but-khana juda

dil teri nazr to sar hai teri shamshir ki nazr
tera nazrana juda tegh ka nazrana juda

zahida 'jauhar'-e-mai-kash se tujhe kya nisbat
tera paimana juda us ka hai paimana juda