ghair-mumkin hai ki wo mujhse KHafa ho jaega

ghair-mumkin hai ki wo mujh se khafa ho jaega
aur agar aisa hua to mo'jiza ho jaega
us ki yaadon ki musalsal chhed se kuchh ho na ho
dil ke zakhmon ka magar mausam hara ho jaega


tu meri thokar mein hai ya main teri thokar mein hun
gardish-e-dauran kisi din faisla ho jaega
kar raha hai jo mera nuqsan apni zat se
hai use ye zo'm wo mera khuda ho jaega


hai misal-e-qatra-e-shabnam andhere ka ghurur
ek zara si raushni se ye fana ho jaega
aao mil kar ekta ki mash'alen raushan karen
do hi din mein nafraton ka khatma ho jaega


khwab aazadi ke dekhe the sukun ke waste
kya khabar thi mulk mera karbala ho jaega