غیر ممکن ہے کہ وہ مجھ سے خفا ہو جائے گا

غیر ممکن ہے کہ وہ مجھ سے خفا ہو جائے گا
اور اگر ایسا ہوا تو معجزہ ہو جائے گا
اس کی یادوں کی مسلسل چھیڑ سے کچھ ہو نہ ہو
دل کے زخموں کا مگر موسم ہرا ہو جائے گا


تو مری ٹھوکر میں ہے یا میں تری ٹھوکر میں ہوں
گردش دوراں کسی دن فیصلہ ہو جائے گا
کر رہا ہے جو مرا نقصان اپنی ذات سے
ہے اسے یہ زعم وہ میرا خدا ہو جائے گا


ہے مثال قطرۂ شبنم اندھیرے کا غرور
اک ذرا سی روشنی سے یہ فنا ہو جائے گا
آؤ مل کر ایکتا کی مشعلیں روشن کریں
دو ہی دن میں نفرتوں کا خاتمہ ہو جائے گا


خواب آزادی کے دیکھے تھے سکوں کے واسطے
کیا خبر تھی ملک میرا کربلا ہو جائے گا