ghalat ki hijr mein hasil mujhe qarar nahin
asir-e-yas hun paband-e-intizar nahin

hai un ke ahd-e-wafa se munasibat dil ko
use qayam nahin hai ise qarar nahin

yahan to zabt-e-junun par na kar mujhe majbur
faza-e-dasht hai ai aql bazm-e-yar nahin

qafas mein dalega kis kis ko aakhir ai sayyaad
asir-e-dam-e-wafa sau nahin hazar nahin

jahan mein bulbul-e-bagh-e-khizan-nasib hun main
meri nawaon mein rangini-e-bahaar nahin