غم کے بادل اگر چھٹے ہوئے تھے

غم کے بادل اگر چھٹے ہوئے تھے
بال مٹی میں کیوں اٹے ہوئے تھے
شاعری دوست رنج گھر دفتر
کتنے حصوں میں ہم بٹے ہوئے تھے


میں علم دار تھا علم تھاما
چاہے بازو مرے کٹے ہوئے تھے
سارا منظر ہمارا منظر تھا
اور منظر سے ہم ہٹے ہوئے تھے


میرؔ صاحب کا تھا شغف اس کو
شعر ہم نے بھی سب رٹے ہوئے تھے
جان لیوا اصول تھے یارم
جن پہ ہم بے سبب ڈٹے ہوئے تھے


جو قدامت پرست تھے عارفؔ
اپنے کردار میں گھٹے ہوئے تھے