گھر میں روزن نہیں رہا کوئی

گھر میں روزن نہیں رہا کوئی
اب نہیں آئے گی صدا کوئی
پوچھ کر دیکھتے پتہ اپنا
کاش ہم کو بھی جانتا کوئی


میں نے مسجد میں جانا چھوڑ دیا
روز مل جاتا تھا خدا کوئی
سارے ویرانے ہو گئے ناکام
مجھ کو تنہا نہ کر سکا کوئی


زندہ رہنے کے مشورے کے ساتھ
یار ترکیب بھی بتا کوئی
آرزو تھی کہ ایک بار مجھے
میری آنکھوں سے دیکھتا کوئی


چیخنے والے ہو گئے خاموش
پھر دریچہ نہیں کھلا کوئی
زہر اتنے پلائے لوگوں نے
مجھ میں زندہ نہیں بچا کوئی