ghazlon ki dhanak odh mere shoala-badan tu
hai mera sukhan tu mera mauzu-e-sukhan tu

kaliyon ki tarah phut sar-e-shakh-e-tamanna
khushbu ki tarah phail chaman-ta-ba-chaman tu

nazil ho kabhi zehn pe aayat ki surat
aayat mein dhal ja kabhi jibril dahan tu

ab kyun na sajaun main tujhe dida o dil mein
lagta hai andhere mein sawere ki kiran tu

pahle na koi ramz-e-sukhan thi na kinaya
ab nuqta-e-takmil-e-hunar mehwar-e-fan tu

ye kam to nahin tu mera meyar-e-nazar hai
ai dost mere waste kuchh aur na ban tu

mumkin ho to rahne de mujhe zulmat-e-jaan mein
dhundega kahan chandni raaton ka kafan tu