goshe goshe pe koi naqsh-e-qadam banta hai

goshe goshe pe koi naqsh-e-qadam banta hai
bante bante kisi raste ka bharam banta hai
phailti jati hai pahle teri khushbu har samt
aur phir shahr ka phailaw hajam banta hai


jis tarah rakkha gaya tha mera dil sine mein
shah ke waste mahlon mein haram banta hai
meri nindon mein jagah dhundne wale ai dost
nam kisi aankh mein hota nahin nam banta hai


bij gamlon mein kabhi ped nahin ban pata
dukh tere hijr mein aata hai to gham banta hai
teri khushbu se tere shahr ka naqsha samjha
is hawale se mera fasla kam banta hai