گوشے گوشے پہ کوئی نقش قدم بنتا ہے

گوشے گوشے پہ کوئی نقش قدم بنتا ہے
بنتے بنتے کسی رستے کا بھرم بنتا ہے
پھیلتی جاتی ہے پہلے تری خوشبو ہر سمت
اور پھر شہر کا پھیلاؤ حجم بنتا ہے


جس طرح رکھا گیا تھا مرا دل سینے میں
شاہ کے واسطے محلوں میں حرم بنتا ہے
میری نیندوں میں جگہ ڈھونڈنے والے اے دوست
نم کسی آنکھ میں ہوتا نہیں نم بنتا ہے


بیج گملوں میں کبھی پیڑ نہیں بن پاتا
دکھ ترے ہجر میں آتا ہے تو غم بنتا ہے
تیری خوشبو سے ترے شہر کا نقشہ سمجھا
اس حوالے سے مرا فاصلہ کم بنتا ہے