گزشتہ کچھ دنوں سے بیکلی ہے

گزشتہ کچھ دنوں سے بیکلی ہے
کسی کی یاد نے حالت یہ کی ہے
جسے سجدے سلامی دے رہے ہیں
ترا سجدہ حسین ابن علی ہے


رسول دو سرا فرما رہے ہیں
خدیجہ سی نہ کوئی دوسری ہے
کہانی کار سے کاہے کا جھگڑا
کوئی کردار بھی کب دائمی ہے


ابھی سوچا تھا لکھوں چاند اس پر
سر قرطاس پھیلی روشنی ہے
تو عادل ہے بتا میرے خدایا
گزاری ہم نے جو وہ زندگی ہے


زمانے بھر کے غم اور اک ترا غم
اسی غم سے ہماری ہر خوشی ہے
اگر ایسا ہوا تو ایسا ہوگا
برائے جاں عذاب آگہی ہے


سنا ہے فاتح عالم تھی لیکن
محبت ہاتھ باندھے اب کھڑی ہے
ترے ہوتے بہت آزاد تھے ہم
نہیں تو پاس تو جاں پر بنی ہے


ہوئے تسنیمؔ مشرک جس کی خاطر
اسے توحید کی ہچکی لگی ہے