guzre mausam ka chalan dil se mere goya hai

guzre mausam ka chalan dil se mere goya hai
tujh ko kho kar bhi kahan dil ne tujhe khoya hai
zabt ke ashk dabae hain tere hone par
chand hijrat ke mahinon mein bahut roya hai


har ghadi soch ko bandha hai teri yaadon se
har ghadi yaad ko ashkon se teri dhoya hai
wasl ki chah mein dekhe hain zamane kitne
kitni sadiyon se tera majnun nahin soya hai


kis ne sazish ki zaminon pe hain kati faslen
zahr ka bij bata kis ne yahan boya hai
hum ne bailon ko nahin bandha zara ghaur karo
rizq ne bandh ke insan ko yahan joya hai