haal mazi ka silsila kate
waqt ki waqt har sada kate

lamha lamhe ka yun gala kate
sanp ko jaise newla kate

ganw ka shahar silsila kate
mehr-o-ikhlas ka gala kate

is tarah katti kahan talwar
jis tarah khanjar-e-ana kate

zist ki tang kothari aur main
jaise mujrim koi saza kate

kis talluq ki hai saza aakhir
khud mujhe aaj ghar mera kate

hai koi jyotishi kahin aisa
jo hatheli pe bhi likha kate