hai kushada zamin nikal jaen

hai kushada zamin nikal jaen
khud ko dhunden kahin nikal jaen
ya to sine se dil nikal jae
ya to dil se hasin nikal jaen


ek guzarish hai mehrbanon se
chhod den aastin nikal jaen
han diwanon ke aastane se
sab zahin-o-fatin nikal jaen


ya to dil dho ke aaen ka’be mein
ya to sab zaerin nikal jaen
hum meri jaan aap ke dil se
itna aasan nahin nikal jaen


budhe walid se naujawan beta
kah raha tha kahin nikal jaen
teri aankhon ke 'faiz' moti hain
hum ki aansu nahin nikal jaen