hain uljhanen tamam meri zindagi ke sath

hain uljhanen tamam meri zindagi ke sath
insaf kar raha hun magar sha'iri ke sath
ye aur baat hai main ziyaada na mil sakun
milta nahin kisi se magar be-dili ke sath


kaam aai tirgi mein charaghon ki dosti
guzri shab-e-hayat meri raushni ke sath
bikhre hue wajud ko apne samet kar
hum jina chahte hain badi sadgi ke sath


hai jis ka jaisa zarf wo waisa kiya kare
karte nahin hain hum to dagha dosti ke sath
'alam' amir-e-shahr bhi karta hai ehtiram
rahte hain itni shan se hum muflisi ke sath