ham-nafas kya kahun kya kya shab-e-hijran dekha

ham-nafas kya kahun kya kya shab-e-hijran dekha
maut to dekhi nahin maut ka saman dekha
dil ke har dagh-e-mohabbat ko farozan dekha
hum ne ghar baithe hue lutf-e-charaghan dekha


ka’ba-o-dair gae dhundne na-fahmi thi
un ko dekha bhi to nazdik-e-rag-e-jaan dekha
nale bezar asar se hain asar nale se
dost ko dost ka dushman shab-e-hijran dekha


wo dil-e-zar ho mera ki ho sham’-e-sozan
jis ko dekha teri mahfil mein pareshan dekha
phir bahaar aai khizan-dida chaman mein sad-shukr
aaj phir 'rafat'-e-mahzun ko ghazal-khwan dekha