ہمارے گھاؤ کبھی ہم کو بھی دکھائی دیں

ہمارے گھاؤ کبھی ہم کو بھی دکھائی دیں
علاج ایسا کرو خود کو ہم سنائی دیں
کوئی طبیب بھی چارہ گری پہ راضی نہیں
مزار زیست پہ اب کس کو ہم دہائی دیں


مکر گیا ہے مرا یار اپنے وعدے سے
مبارکی میں اسے کیوں نہ ہم مٹھائی دیں
وفا کا سنتے ہی کچھ لوگ مجھ سے کہتے ہیں
جناب آپ بھی اس کی کبھی صفائی دیں


یہ کیا کہ فیض ترا اوروں میں ہی بٹتا ہے
کبھی تو نین ترے ہم کو بھی رسائی دیں