hamare hissa mein kuchh aise ham-safar aae

hamare hissa mein kuchh aise ham-safar aae
hamein pata hai ki hum kaise apne ghar aae
ab aur kaise mohabbat ka haq ada karte
tumhaari qabr mein hum khud ko dafn kar aae


ghazal ki aankh se dekha tha hum ne duniya ko
har ek samt hamein phul hi nazar aae
hamare pas jo gul-dan tha mohabbat ka
hum us mein apne hi khwabon ki rakh bhar aae


hamare sathi to sab kho gae udanon mein
hamin akele palat kar zamin par aae
ye waqt kaun se qisse sunane baith gaya
nishan jitne the dil par sabhi ubhar aae