ہماری چھت پہ بھی سورج کا انتظام ہوا

ہماری چھت پہ بھی سورج کا انتظام ہوا
یہ اور بات کہ یہ کام وقت شام ہوا
اٹھے رقیب تو پھر مجھ سے بیٹھنے کو کہا
تمہاری بزم میں یوں میرا احترام ہوا


سفر میں تم سے کنارہ کیا تمہارے لیے
مگر بچھڑنے کا افسوس گام گام ہوا
کہ جیسے ڈانٹ دے کوئی یتیم بچے کو
ہماری حسرت دل کا یوں اختتام ہوا


ہمارے دل کو دکھائی گئی نئی دنیا
کچھ اس طرح یہ پرندہ بھی زیر دام ہوا
بچھڑ کے تجھ سے ہنر شاعری کا سیکھ لیا
یوں اہل درد کے جینے کا انتظام ہوا