ہمیں اپنے ہی جیسا دوسرا ہونے کا وقت آیا

ہمیں اپنے ہی جیسا دوسرا ہونے کا وقت آیا
محبت آئی اور خود سے جدا ہونے کا وقت آیا
اٹھا وہ وقت آرایش کہ محفل ہونے والی ہے
پھر اس کے عاشقوں کے آئنہ ہونے کا وقت آیا


موذن نے اذاں دی اور وہ بت نکلا خدا بن کر
خدا کی سب نمازوں کے قضا ہونے کا وقت آیا
جنوں کو امتحاں لینا ہے اب اہل محبت کا
لباس جسم اتارو بے حیا ہونے کا وقت آیا


بگڑتی جا رہی ہیں ساری شکلیں کتنی تیزی سے
ہمارے شہر کے کیا جانے کیا ہونے کا وقت آیا
خزاں میں تو پرانا پن اترتا ہے درختوں کا
خزاںؔ میں تو درختوں کے نیا ہونے کا وقت آیا


تمہارا بت تمہاری بندگی کرنے پہ راضی ہے
تو پیارے فرحت احساسؔ اب خدا ہونے کا وقت آیا