har chand tere shahr ke ab kucha-gard hain

har chand tere shahr ke ab kucha-gard hain
lekin is apne daur mein hum log fard hain
samjhe nahin zaban ghazalon ki aaj tak
hum bhi jo ek 'umr se sahra-naward hain


guzre hain hum bhi pech-o-kham-e-rah-e-zist se
ya'ni ki hum bhi waqif-e-har-garm-o-sard hain
kya kya hain ikhtiyar-o-irada ki tohmaten
hum par bisat-e-jabr ki jo ek nard hain


jis se gudaz-o-garm zamir-e-wajud hai
hum sina-e-hayat ki wo aah-e-sard hain
dekha hai aaj hum ne bhi ja kar 'bashir' ko
be-shak abhi zamane mein kuchh ahl-e-dard hain