har ek shakhs ko dhoke mein dal rakkha hai
tumhaare lahje mein kitna kamal rakkha hai

tu hi bata de ki kitne zalil honge hum
hamare hisse mein kab tak zawal rakkha hai

judaiyan bhi hamein dur kar nahin saktin
chhupa ke hijr mein tum ne visal rakkha hai

tumhaare hijr mein tute magar nahin bikhre
tumhaari yaad ne ab tak sambhaal rakkha hai

bichhad ke bhi nahin bhulega wo hamein 'kashfi'
isi khayal se dil ko sambhaal rakkha hai