har roz rah takti hain mere singhaar ki

har roz rah takti hain mere singhaar ki
ghar mein khili hui hain jo kaliyan anar ki
kal un ke bhi khayal ko main ne jhatak diya
had ho gai hai mere bhi sabr-o-qarar ki


mazi pe guftugu se wo ghabra rahe the aaj
main ne bhi aaj baat wahi bar bar ki
ab pyar ki ada pe bhi jhunjhla rahe hain wo
kahte hain mujh ko fikr hai kuchh karobar ki


aksar to log pahli sada par hi bik gae
boli to go lagi thi bade e'tibar ki
zinda rahi to nam bhi lungi na pyar ka
saugand hai mujhe mere parwardigar ki


sab ka khayal ghar ki sajat ki mahfilen
main ne bhi ab ye aam rawish ikhtiyar ki