har samt ek dhuan hai har gam tirgi hai

har samt ek dhuan hai har gam tirgi hai
duniya tere safar mein ye kaisi raushni hai
zulmat ki rah-guzar pe ulfat sisak rahi hai
ye kaun be-hisi hai ye kaun bebasi hai


tanha hi chal rahe hum manzil ki aarzu mein
har subh ajnabi hai har sham ajnabi hai
apni hi dhun mein sab hain har shakhs dar-ba-dar hai
ye kaisi justuju hai ye kaisi tishnagi hai


hum mar ke ji rahe hain khwabon ki anjuman mein
nakaam hasraten hain gumnam zindagi hai
'abid' tumhaare haq mein har lab pe ek gila hai
har dil mein ek chubhan hai har aankh shabnami hai