ہر سمت اک دھواں ہے ہر گام تیرگی ہے

ہر سمت اک دھواں ہے ہر گام تیرگی ہے
دنیا ترے سفر میں یہ کیسی روشنی ہے
ظلمت کی رہگزر پہ الفت سسک رہی ہے
یہ کون بے حسی ہے یہ کون بے بسی ہے


تنہا ہی چل رہے ہم منزل کی آرزو میں
ہر صبح اجنبی ہے ہر شام اجنبی ہے
اپنی ہی دھن میں سب ہیں ہر شخص در بہ در ہے
یہ کیسی جستجو ہے یہ کیسی تشنگی ہے


ہم مر کے جی رہے ہیں خوابوں کی انجمن میں
ناکام حسرتیں ہیں گمنام زندگی ہے
عابدؔ تمہارے حق میں ہر لب پہ اک گلہ ہے
ہر دل میں اک چبھن ہے ہر آنکھ شبنمی ہے