har shakh-e-gul ko be-sar-o-saman bana diya
yaron ne gulsitan ko bayaban bana diya

takhliq sab ki ek hai aamal ne magar
kafir tujhe to mujh ko musalman bana diya

is jaan-e-gulsitan ki tamanna ne ai nadim
mujh ko har ek chaman se gurezan bana diya

dushwar ho chuki thi mujhe zindagi magar
saqi-e-dil-nawaz ne aasan bana diya

'asi' khuda ka shukr karo jis ke lutf ne
auron ke sath tum ko bhi insan bana diya