har taraf har jagah be-shumar aadmi
phir bhi tanhaiyon ka shikar aadmi

subh se sham tak bojh dhota hua
apni hi lash ka khud mazar aadmi

har taraf bhagte daudte raste
har taraf aadmi ka shikar aadmi

roz jita hua roz marta hua
har nae din naya intizar aadmi

ghar ki dahliz se gehun ke khet tak
chalta phirta koi karobar aadmi

zindagi ka muqaddar safar-dar-safar
aakhiri sans tak be-qarar aadmi