ہرے ہوئے نہیں اطراف کے شجر میرے

ہرے ہوئے نہیں اطراف کے شجر میرے
مجھے تو یوں بھی اضافی ہیں بال و پر میرے
بھٹکنے والے بھی اک روز گھر پہنچتے ہیں
بتا رہا تھا کوئی ہاتھ دیکھ کر میرے


کچھ اس لیے بھی مجھے راستہ درست لگا
چلے نہیں تھے مرے ساتھ ہم سفر میرے
بچھڑنے پر مری پوروں سے خون رسنے لگا
قریب رہنے لگا تھا وہ اس قدر میرے


میں اپنی کھوج میں نکلا تھا رفتگاں کی طرف
بکھر گئے ہیں زمانے ادھر ادھر میرے
فروخت ہونے پہ آمادہ ہو گیا آخر
مجھے چراغ نہ کہتے تھے کوزہ گر میرے