harim-e-dil mein agar teri justuju karte

harim-e-dil mein agar teri justuju karte
na but-kade ki na ka'be ki aarzu karte
khuda ke waste de ab to jam ai saqi
zaban sukh gai hai subu subu karte


kisi ke 'ishq mein jal jal ke khak ho jate
basan-e-sham’ na hum sharh-e-arzu karte
tumhaara jalwa to dekha tumhein nahin dekha
tamam sarf hui 'umr justuju karte


zaban ko rokna tha ikhtiyar mein un ke
na ban padi thi jo musa se guftugu karte
kabhi to hairat-e-dil hum se puchh leta tu
tujhi se hum tere milne ki aarzu karte


ye sach hai wo hamein 'rafat' zarur mil jate
agar talash qarib-e-rag-e-gulu karte