hawa-e-tez ke aage kahan rahega koi
diye pe waqt sada mehrban rahega koi

ai dost hum bhi zamin par dhuen ki surat hain
faza mein kitna dhuan hai dhuan rahega koi

ajib naqsh banae hain wahshat-e-dil ne
magar ye ret hai is par nishan rahega koi

makan-e-dil ki sabhi raunaqen makinon se
makin hi na rahe to makan rahega koi

suragh laegi kitne nae jahanon ka
ye aagahi ka safar raegan rahega koi

jo dil ki jhil hi jazbon se ho gai khali
to apni aankh mein aab-e-rawan rahega koi

hum apne sath hi le jaenge jahan apna
hamare baad to yunhi jahan rahega koi