hazaron pech-o-KHam aur justuju-e-daimi kab tak

hazaron pech-o-kham aur justuju-e-daimi kab tak
agar manzil koi shai hai to phir ye gumrahi kab tak
gurezan jada-e-insaniyat se aadmi kab tak
chhupai jaegi tarikiyon mein raushni kab tak


rahe koi pareshan-haal-o-mahrum-e-khushi kab tak
sulagti dubti sahmi hui si zindagi kab tak
zaban di hai to phir hukm-e-zaban-bandi se kya hasil
ab izn-e-lab-kushai de ye jabr-e-khamushi kab tak


dam-e-nazzara ek sho'la sa chamka hosh kho baithe
nahin ma'lum us ke ba'd ye haalat rahi kab tak
ijazat ho agar to puchh lun in hosh walon se
rahegi bahs ka 'unwan meri diwangi kab tak


tadapti chikhti roti hui ghamnak-o-afsurda
isi ka nam agar hai zindagi to zindagi kab tak
zara bigde hue insan ko hosh aa jae to puchhun
ye khud-bini kahan tak ye fareb-e-agahi kab tak


nahin milta to phir khud apna hissa chhin le badh kar
ye majburi ki dhun par naghma-e-bechaargi kab tak
koi aasuda-o-sairab kyon hota nahin 'maikash'
ye mai-khana hai maikhane mein daur-e-tishnagi kab tak